التى الاشتىڭ ارداقتىسى ماعجان جۇماباەۆتىڭ 125 جىلدىق تويى تۋعان جەرىندە ودان ءارى جالعاستى.
م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە وتكەن «ماعجان جۇماباەۆ مۇراسى جانە الەمدىك رۋحانيات» اتتى حالىقارالىق عىلىمي-تاجىريبەلىك كونفەرەنتسياعا جينالعان شەتەلدىك, وتاندىق عالىمدار, ماعجانتانۋشىلار,زەرتتەۋشىلەر تۇركى جۇرتىنا ورتاق تۇلعانىڭ شىعارماشىلىق ەرەكشەلىكتەرى جايلى باياندامالار جاساپ, تانىمدىق وي-پىكىرلەرىمەن ءبولىستى. القالى باسقوسۋدا سويلەگەن سوزىندە وبلىس اكىمى قۇمار اقساقالوۆ «جارقىراپ كۇنگە تابىنعان, وزىنە عانا باعىنعان, جۇرەگى مەن جانى وت» ارقالى اقىن مۇراسى جاس بۋىن بويىندا وتانشىلدىق سەزىمدەردى قالىپتاستىرۋدا زور تاربيە قۇرالى بولىپ قالا بەرەتىنىن اتاپ ءوتتى. «رۋحاني جاڭعىرۋ» باعدارلاماسى اياسىندا جەرلەسىمىزدىڭ ءومىرى مەن شىعارماشىلىعىن ناسيحاتتاۋ ىسىنە زور ۇلەس قوسقان بىر توپ ازاماتقا «ماعجان جۇماباەۆ» توسبەلگىسى سالتاناتتى تۇردە تابىس ەتىلدى. اقپارات جانە كوممۋنيكاتسيا مينيسترلىگىنىڭ «ەستەلىك جانە مەرەيتويلىق داتالار» سەرياسىمەن ازىرلەگەن «ماعجان جۇماباەۆتىڭ تۋعانىنا 125 جىل» پوشتا ماركاسى اينالىمعا ەنگىزىلدى. ء«بىزدىڭ ماعجان» ەكىتومدىق ەڭبەكتىڭ, «ماعجان جۇماباەۆ» ەنتسيكلوپەدياسىنىڭ تۇساۋكەسەرى ۇيىمداستىرىلدى.
ءجيىندا بىلىم جانە عىلىم ءمينيسترى ەربول ساعاديەۆتىڭ, حالىقارالىق تۇركى اكادەمياسىنىڭ پرەزيدەنتى دارحان قىدىرالىنىڭ, پارلامەنت ءماجىلىسىنىڭ دەپۋتاتى اباي تاسبولاتوۆتىڭ مەرەيتويعا جولداعان قۇتتىقتاۋ حاتتارى وقىلدى. «تۇركسوي» حالىقارالىق ۇيىمىنىڭ باس حاتشىسى دۇيسەن قاسەيىنوۆ, اقش-تاعى ميچيگان ۋنيۆەرسيتەتىنىڭ پروفەسسورى تيمۋر قوجاوعلى, گازي ۋنيۆەرسيتەتى تۇركىتانۋ ورتالىعىنىڭ ديرەكتورى حۋليا چەنگەل, استاناداعى اگرارلىق ۋنيۆەرسيتەتتىڭ پروفەسسورى, تاريح عىلىمدارىنىڭ دوكتورى حانكەلدى ءابجانوۆ,قاراقالپاقستاننىڭ حالىق اقىنى مۇزافار احماد, قىرعىزستان جازۋشىلار وداعىنىڭ توراعاسى اقبار رىسقۇلوۆ, تاعى باسقالارى الەمدىك دەڭگەيدە ۇلىقتاۋعا لايىق ۇلت تارلانبوزىنىڭ رۋحى عاسىرلار بويى جاساي بەرەتىنىن, ونىڭ ەسىمى «ماڭگىلىك ەل», « ۇلى دالا» ۇعىمدارىمەن تىعىز ساباقتاس ەكەنىن العا تارتتى.
«ماعان اتاق ۇلتىم ءۇشىن ولگەنىم!» دەپ حالقى ءۇشىن باسىن ولىمگە تىككەن اقىن مەرەيتويى «ماعجان كوكتەمى» رەسپۋبليكالىق ونەر فەستيۆالى مەن گالا-كونتسەرتكە جالعاستى. وندا جازبا اقىندار ءمۇشايراسى, اقىن ولەڭدەرىنە جازىلعان جاڭا اندەر مەن كوركەمسوز شەبەرلەرى اتالىمدارىنىڭ ءار كەزەڭدەگى جەڭىمپازدارى مەن جۇلدەگەرلەرى ساحنا تورىنە كوتەرىلىپ, جىردان, اننەن شاشۋ شاشتى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى